Жастарға ұлттық дәстүр мен діни сауаттылықты түсіндіру мақсатында Қызылордада кездесу өтті

Жастар арасында діни экстремизмнің таралуы мен ұлттық дәстүрдің маңыздылығын түсіндіру үшін Қызылордада өткен кездесу ерекше назар аударды. Ғаламтор мен әлеуметтік желілер қазіргі жастардың бос уақытын өткізетін басты алаңы болып табылады, алайда, бұл жерде теріс пиғылды діни ағымдардың ықпалы да күшейіп келеді. Жасөспірімдер арасында діни экстремистік идеологиялардың таралуына қарсы тұру үшін, білім беру мекемелері мен жастар ұйымдарының бірлескен жұмысы аса маңызды.

Діни сауаттылық пен ұлттық дәстүрді дәріптеу

Қызылорда қаласындағы №9, №189, №222, №282, №264 мектеп оқушылары мен М. Мәметова атындағы Қызылорда педагогикалық жоғары колледжінің студенттеріне арналған ақпараттық-түсіндіру жұмыстары "діни экстремизм, оның қоғамға қауіпі және оның алдын алу мен ұлттық дәстүрді сақтай білу маңыздылығы" тақырыбында жүргізілді. Кездесудің мақсаты – жастардың діни сауаттылығын арттыру арқылы, оларды экстремистік ұйымдардың ықпалынан қорғау.

Іс-шара барысында Сәкен Алдашбаев діни экстремистік ұйымдардың қоғамға тигізетін кері әсері мен олардың негізгі белгілері туралы баяндап, жастардың сыни ойлау қабілетін дамыту қажеттілігін атап өтті. Ұлттық дәстүр мен мәдени мұраның жас ұрпақты тәрбиелеудегі рөліне ерекше назар аударылды. Баяндамашы дәстүрлі құндылықтарды сақтау арқылы, экстремисттік діни идеологияларға қарсы тұру мүмкіндігін жеткізді.

Сонымен қатар, жастарға интернет кеңістігіндегі діни мазмұндағы ақпараттарға сыни тұрғыдан қарау, тек ресми және сенімді ақпарат көздеріне жүгіну қажеттігі түсіндірілді. Жиын соңында студенттер көкейлерінде жүрген сауалдарына нақты әрі тұщымды жауаптар алды. Бұл шара жастарға діни тақырыптағы күрделі сұрақтардың түйінін тарқатуға мүмкіндік беріп, рухани кемелденуге, дін мен дәстүр үндестігін тереңірек түсінуге бағытталған маңызды қадам болды.