Кімнің мойнында: иесі ме, жалға алушы ма?
Жүк көлігін жалға беру кезінде иелер мен жалға алушылар арасында жиі туындайтын сұрақ: жол парағын кім рәсімдеуі керек?
2003 жылғы 4 шілдедегі №476 «Автомобиль көлігі туралы» заңға сәйкес, автомобиль тасымалдаушысы (тасымалдаушы) – жолаушыларды, багажды, жүктерді және пошта жөнелтілімдерін тасымалдау бойынша кәсіпкерлік қызметті жүзеге асыратын, жеңіл автомобильдерді қоспағанда, автокөлік құралдарына меншік құқығы немесе өзге де заңды негіздерінде ие болатын жеке немесе заңды тұлға.
Заңның 1-бабы 15-тармағына сәйкес, жол парағы – жүргізуші мен автокөлік құралының жұмысын есепке алу және бақылау үшін арналған қағаз немесе электрондық-цифрлық нысандағы құжат.
Жол парақтары мен тауар-көлік жүкқұжаттары (ТТН) тасымалдаушы тарапынан қағаз жеткізгіште немесе электрондық-цифрлық құжат нысанында бір ауысымға (рейске) дейін әрбір жүк көлік құралына бөлек рәсімделеді. Оған жол парағын, тауар-көлік жүкқұжатын және CMR-ді (жүктерді автокөлікпен тасымалдау кезінде) толтыру үшін мәліметтер енгізіледі. Тауар-көлік жүкқұжатындағы жекелеген деректерді жүк жөнелтуші (жүк алушы) де толтыра алады.
Қағаз жеткізгіште рәсімделген жол парақтары мен ТТН тасымалдаушының және жүк жөнелтушінің (жүк алушының) мөртабаны немесе мөрімен куәландырылады.
Жол парақтарын рәсімдеу міндеті тасымалдауды жүзеге асыратын ұйымға жүктеледі, яғни егер автокөлік жалға берілсе, онда жол парағын рәсімдейтін – жалға алушы. Ал жалға беруші жалға берілген автокөлік үшін жол парақтарын рәсімдемейді.
